Algemene Inligting

Ons skool se Visie: "Ons skool se visie is om individue te ontwikkel wat met vertroue as leiers kan optree in 'n snel veranderende wêreld."

Ons skool se Missie: "Ons skool se missie is gerig op die kind as individu: om laerskoolkinders te begelei om hul Godgegewe talente te ontdek en optimaal te ontwikkel binne 'n klimaat van liefde en geborgenheid."

Skool Geskiedenis

Laerskool Welgemoed het sy ontstaan gehad in 1965 met 41 leerders en 2 Opvoeders. Die skool was gehuisves oorkant die straat waar Pick ‘n Pay tans geleë is. Getrou aan sy leuse, “Prospicimus” (kyk vooruit), het die skool gegroei en uitgebrei en danksy toegewyde hulp en samewerking van ‘n betrokkke ouergemeenskap, is Laerskool Welgemoed tegelyk dankbaar en trots om te kan sê dat ons ons leerders uitstekende fasiliteite bied in ‘n bykans volmaakte omgewing.

Dit is ons strewe om ‘n warm, ontspanne atmosfeer te skep waarin ons kinders gekoester word en ons ons missie uitleef om ons leerders te lei sodat hulle hul Godgegewe talente optimaal kan benut in ‘n klimaat van liefde en sekuriteit.

Ons is uniek in die sin dat ons ‘n betreklike klein skool is, maar ons is al geseën met talle onthou-oomblikke waar ons kon deel in die vreugde van uitsonderlike prestasies deur ons leerders oor ‘n breë spektrum aktiwiteite: akademiese uitnemendheid, sport, kuns en kultuur, leierskap. Rede genoeg om onsself “Blessies” te noem, maar by Laerskool Welgemoed verwys ons na onsself as die “Blessie-familie” as gevolg van die bleshoender op ons skoolwapen.

By Laerskool Welgemoed dra ons waarlik die belange van elke lid van ons familie op die hart. In ons strewe na uitnemendheid integreer ons kennis en tegnologie. Afgesien daarvan dat ons beskik oor ‘n ten volle toegeruste media-sentrum met ‘n Interaktiewe Witbord-fasiliteit, sowel as ‘n rekenaarlokaal waar al ons leerders in IT onderrig word, is elke klaskamer in ons skool ook toegerus met ‘n rekenaar en plasmaskerm. Om ‘n doel te bereik, is die kulminasie van talent, toewyding en volharding. Sommige is gedeelde doelwitte, ander is persoonlik. Omdat ons by Laerskool Welgemoed elke leerder toewens om enigermate van sukses te ervaar, bied ons remediërende hulp by die Prospicimus Opvoedkundige Sentrum, sowel as toegang tot gespesialiseerde dienste soos spraak-en arbeidsterapie. Ons het ook ‘n toegewyde Opvoeder-Ondersteuningspan om leerders by te staan wat hulp benodig.

Laerskool Welgemoed mag ‘n (relatiewe) klein skool wees, maar ons het ‘n groot hart en reuse-drome vir ons leerders. Ons voltooi die roete stap vir stap.

"Feeder/Service areas"

• Tygerberg Heuwels
• Loevenstein
• Hoheizen
• Welgemoed
• Door-de-Kraal
• Welgedacht
• Protea Vallei
• Kanonberg
• Oude Westhof
• Van Riebeeckshof

Maak asb u keuse met die navigasie aan die linkerkant.